مراکش کی خاتون فٹبالر فاتن بن عمر العزیزی اسپین کے خودمختار علاقے سیوٹا پہنچنے کی کوشش کے دوران سمندر میں ڈوب کر جاں بحق ہو گئیں۔ ان کی المناک موت نے مراکش، بالخصوص طنجہ کے فٹبال حلقوں کو سوگ میں مبتلا کر دیا ہے۔
مقامی میڈیا رپورٹس کے مطابق فاتن بن عمر العزیزی ماضی میں موغریب ایتلیٹیکو تطوان کی نمائندگی کر چکی تھیں۔ وہ بہتر مستقبل کی امید میں خطرناک سمندری راستے سے اسپین جانے کی کوشش کر رہی تھیں، تاہم سفر کے دوران پیش آنے والے حادثے میں اپنی جان سے ہاتھ دھو بیٹھیں۔
رپورٹس کے مطابق حالیہ ہفتوں میں شمالی مراکش سے سیوٹا کی جانب غیر قانونی ہجرت کی کوششوں میں نمایاں اضافہ دیکھنے میں آیا ہے۔ خراب موسمی حالات، تیز لہریں اور غیر محفوظ سفر کے باعث متعدد افراد اپنی جانیں گنوا چکے ہیں۔
فاتن العزیزی کی وفات کی خبر سامنے آنے کے بعد ساتھی کھلاڑیوں، دوستوں اور مراکش کی فٹبال برادری نے گہرے دکھ اور افسوس کا اظہار کیا۔ انہیں ایک باصلاحیت، محنتی اور خوش اخلاق کھلاڑی قرار دیتے ہوئے ان کی اچانک جدائی کو کھیلوں کے لیے بڑا نقصان قرار دیا جا رہا ہے۔
یہ افسوسناک واقعہ ایک بار پھر غیر قانونی ہجرت کے خطرناک راستوں اور ان سے جڑے انسانی المیوں کی سنگینی کو اجاگر کرتا ہے۔