پاکستان تحریک انصاف نے پیپلز پارٹی کے ساتھ مذاکرات کے امکان کو مسترد کرتے ہوئے دونوں بڑی سیاسی جماعتوں کو شدید تنقید کا نشانہ بنایا ہے۔
پشاور میں پریس کانفرنس کرتے ہوئے پی ٹی آئی کے مرکزی ترجمان شیخ وقاص اکرم نے کہا کہ پیپلز پارٹی اور مسلم لیگ ن دونوں کے ساتھ مذاکرات نہیں کیے جا رہے اور پارٹی پیپلز پارٹی سے کسی قسم کی بات چیت کے حق میں نہیں۔
شیخ وقاص اکرم کا کہنا تھا کہ بانی پی ٹی آئی کی صحت پارٹی کے لیے ریڈ لائن ہے اور اس معاملے پر کسی قسم کا سمجھوتہ نہیں کیا جائے گا۔ ان کے مطابق کئی ماہ گزرنے کے باوجود بانی پی ٹی آئی سے ملاقات کی اجازت نہیں دی جا رہی، جس پر پوری پارٹی کو تشویش ہے۔
انہوں نے کہا کہ پی ڈی ایم کی تمام جماعتیں مل کر بھی تحریک انصاف کو ختم نہیں کرسکیں اور قوم آج بھی بانی پی ٹی آئی کے ساتھ کھڑی ہے۔
پی ٹی آئی ترجمان نے عدلیہ سے مطالبہ کیا کہ بانی پی ٹی آئی کی صحت کا نوٹس لیا جائے اور ان سے فوری ملاقات کی اجازت دی جائے، جبکہ ان کے مقدمات کو بھی جلد سماعت کے لیے مقرر کیا جائے۔
شیخ وقاص اکرم نے پنجاب اور سندھ حکومتوں کو بھی تنقید کا نشانہ بناتے ہوئے مختلف سیاسی اور انتظامی معاملات پر سوالات اٹھائے اور دو خواتین کی تھانے میں ہلاکت کے واقعے کی جوڈیشل انکوائری کا مطالبہ کیا۔
انہوں نے کہا کہ پی ٹی آئی ججز کی تعیناتی میں سیاسی مداخلت کو مسترد کرتی ہے، جبکہ جمعیت علمائے اسلام کے ساتھ پارٹی کی بات چیت ایشو ٹو ایشو بنیادوں پر جاری رہ سکتی ہے۔
یوں پی ٹی آئی نے ایک جانب پیپلز پارٹی کے ساتھ مذاکرات کے دروازے بند رکھنے کا واضح اعلان کیا ہے تو دوسری جانب حکومت اور دیگر سیاسی جماعتوں پر اپنے سخت سیاسی مؤقف کو بھی دہرایا ہے۔