اسلام آباد کے سیکٹر G-5 اور ملحقہ علاقوں میں ہونے والی شدید موسلادھار بارش کے باعث معمولِ زندگی متاثر ہو گیا۔ کئی سڑکیں زیرِ آب آ گئیں جبکہ مختلف مقامات پر پانی کا بہاؤ اتنا تیز ہے کہ متعدد گاڑیاں آدھی سے زیادہ پانی میں ڈوب گئیں اور ٹریفک کی روانی شدید متاثر ہوئی۔
شہریوں کو ہدایت کی گئی ہے کہ جب تک پانی کی سطح معمول پر نہیں آ جاتی، سیکٹر G-5 کی جانب غیر ضروری سفر سے گریز کریں اور متبادل راستوں کا استعمال کریں۔
انتظامیہ نے ڈرائیورز کو خبردار کیا ہے کہ پانی سے بھری سڑکوں پر تیز رفتاری سے گاڑی نہ چلائیں، کیونکہ اس سے انجن بند ہونے اور حادثات کا خطرہ بڑھ جاتا ہے۔
بارش کے دوران بجلی کے کھمبوں، ٹوٹے ہوئے تاروں اور دیگر برقی تنصیبات سے دور رہنے کی بھی ہدایت کی گئی ہے تاکہ شارٹ سرکٹ یا کرنٹ لگنے جیسے خطرات سے بچا جا سکے۔
شہریوں سے اپیل کی گئی ہے کہ کسی بھی ہنگامی صورتحال میں فوری طور پر ریسکیو اداروں سے رابطہ کریں اور اس اہم اطلاع کو دوسروں تک بھی پہنچائیں تاکہ زیادہ سے زیادہ لوگ محفوظ رہ سکیں۔