6
اسلام آباد: وفاقی دارالحکومت میں بڑھتے ہوئے ٹریفک دباؤ کو کم کرنے کے لیے کیپیٹل ڈویلپمنٹ اتھارٹی (سی ڈی اے) نے دو نئے انڈر پاسز تعمیر کرنے کا اعلان کر دیا ہے۔ یہ منصوبے کشمیر چوک اور فیصل مسجد جنکشن پر تعمیر کیے جائیں گے تاکہ اہم شاہراہوں پر ٹریفک کی روانی بہتر بنائی جا سکے۔
سی ڈی اے کے مطابق کشمیر چوک انڈر پاس کی تخمینہ لاگت 1.69 ارب روپے رکھی گئی ہے، جبکہ اس منصوبے کے ٹینڈر 12 اگست کو کھولے جائیں گے۔ انڈر پاس کی تعمیر سے راول ڈیم چوک، مری روڈ اور ملحقہ علاقوں کی جانب آنے اور جانے والی ٹریفک کو نمایاں سہولت ملنے کی توقع ہے۔
دوسری جانب فیصل مسجد جنکشن انڈر پاس اس وقت ڈیزائننگ مرحلے میں ہے۔ منصوبے کا مقصد فیصل ایونیو اور مارگلہ روڈ پر روزانہ پیش آنے والے ٹریفک جام میں کمی لانا اور گاڑیوں کی روانی کو بہتر بنانا ہے۔
سی ڈی اے نے اس کے ساتھ اسلام آباد ایکسپریس وے کی 8.5 کلومیٹر طویل سروس روڈ کی اپ گریڈیشن کا بھی اعلان کیا ہے، جبکہ شہر میں ہنگامی امدادی خدمات کو بہتر بنانے کے لیے ریسکیو 1122 کے چار نئے اسٹیشن بھی قائم کیے جائیں گے۔
انتظامیہ کا کہنا ہے کہ ان ترقیاتی منصوبوں سے نہ صرف ٹریفک کا دباؤ کم ہوگا بلکہ شہریوں کو محفوظ، تیز اور بہتر سفری سہولیات بھی میسر آئیں گی۔