کویت کے وزیر خارجہ شیخ جراح جابر الاحمد الصباح نے پاکستان کے سرکاری دورے کے دوران پاکستان میں کویت کے سفیر ناصر عبدالرحمن جے المطیری کے ہمراہ جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف سے ملاقات کی۔
ملاقات کے دوران دونوں رہنماؤں نے باہمی دلچسپی کے امور، خطے کی مجموعی سکیورٹی صورتحال اور پاکستان و کویت کے درمیان دفاعی اور دوطرفہ تعاون کو مزید وسعت دینے کے مختلف پہلوؤں پر تفصیلی تبادلہ خیال کیا۔
اس موقع پر کویت کے وزیر خارجہ نے علاقائی امن و استحکام کے فروغ کے لیے پاکستان کے مثبت اور تعمیری کردار کو سراہتے ہوئے کہا کہ دونوں ممالک کے درمیان تاریخی، برادرانہ اور بااعتماد تعلقات مستقبل میں مزید مضبوط ہوں گے۔
فیلڈ مارشل سید عاصم منیر نے کویت کے ساتھ پاکستان کے دیرینہ تعلقات کو نہایت اہم قرار دیتے ہوئے اس عزم کا اعادہ کیا کہ دونوں برادر ممالک باہمی تعاون کو مزید فروغ دینے اور خطے میں امن، استحکام اور خوشحالی کے مشترکہ وژن کو آگے بڑھانے کے لیے مل کر کام کرتے رہیں گے۔
ملاقات خوشگوار ماحول میں ہوئی، جس میں دونوں ممالک کے درمیان موجود مضبوط سفارتی اور دفاعی روابط کو مزید مستحکم بنانے کے عزم کا بھی اظہار کیا گیا۔