ابوظبی: قسمت نے 64 سالہ پاکستانی شہری شوکت آفتاب کو کروڑوں کا مالک بنا دیا، جنہوں نے ابوظبی کی Big Ticket کی تازہ قرعہ اندازی میں 1 کروڑ 50 لاکھ درہم یعنی تقریباً 1.14 ارب پاکستانی روپے کا گرینڈ پرائز جیت لیا۔
شوکت آفتاب اس وقت پاکستان میں موجود تھے جب لاٹری انتظامیہ نے انہیں فون کرکے بتایا کہ ان کا ٹکٹ کامیاب ہوگیا ہے۔ اچانک اتنی بڑی رقم جیتنے کی خبر سن کر انہیں یقین نہیں آیا اور انہوں نے ابتدائی طور پر فون کال کو فراڈ یا اسپیم کال سمجھا۔
انتظامیہ نے انہیں ٹکٹ نمبر 245556 کی تصدیق کے لیے لاٹری کی ویب سائٹ اور لائیو ڈرا چیک کرنے کا کہا۔ جب شوکت آفتاب نے تفصیلات کی تصدیق کی تو انہیں یقین ہوگیا کہ واقعی وہ 15 ملین درہم کے گرینڈ پرائز کے فاتح بن چکے ہیں۔
شوکت آفتاب گزشتہ 15 سال سے باقاعدگی سے Big Ticket کے ٹکٹ خرید رہے تھے اور بعض اوقات ایک سے زیادہ ٹکٹ بھی لیتے رہے۔ اس مرتبہ ان کا انفرادی طور پر خریدا گیا ٹکٹ ہی ان کی زندگی کا سب سے بڑا انعام لے آیا۔
اس قرعہ اندازی میں صرف شوکت آفتاب ہی خوش نصیب نہیں رہے۔ چار بھارتی شہریوں اور ایک بنگلادیشی شہری نے بھی ایک ایک لاکھ درہم کے انعامات حاصل کیے۔ جبکہ بھارت سے تعلق رکھنے والے ایک اور شخص رویندرناتھن وینیش نے Dream Car قرعہ اندازی میں Land Rover Defender جیتی۔
شوکت آفتاب کی جیت ایک ایسے شخص کی کہانی بن گئی ہے جس نے 15 سال تک مسلسل قسمت آزمائی اور بالآخر ایک ٹکٹ نے ان کی زندگی بدل دی۔ ان کا کہنا ہے کہ وہ انعامی رقم کو سوچ سمجھ کر استعمال اور سرمایہ کاری کرنے کے ساتھ دوسروں کی مدد بھی کرنا چاہتے ہیں۔